في خفوقي لك حكايــــــــة

في خفوقي لك حكاية ضمها كتاب المشاعر
وفي عيوني لك مدينة يا حلوها من مدينة

انت لو تآمر على روحي من غلاتك بس تامر
فدوى روحي من غلاتك والله ما هي بالثمينة

شفت عاد اش قد انت غالي؟ لا وعندي شي آخر
كل هالعالم بدونك أشبه بدمعة حزينة

احنا لو نكتب محبتنا ضاقت أوراق الدفاتر
وان كتبنا شي تبقى أغلب كنوزه دفينة

انت تبحر في عيوني وانا بعيونك أسافر
فوق غيمة من محبة لا شراع ولا سفينة

جيت لك كلي وضوح بلا قناع ولا مظاهر
وجيتني من طيب أصلك لا غرور ولا ضغينة

تذكر بأول لقانا كيف خانتنا الحناجر
الحكي عيا وحروفه في محاجرنا سجينة

وكانت عيونك مرايا بعثرت أوراق شاعر
وكنت أقرا في عيونك رعشة الشوق وحنينه

تصدق اني من بعدك صارت ضلوعي منابر
كم تعلاها خفوقي يشجب البعد ويدينه

بصراحه في غيابك تنغلق كل المعابر
كل هالدنيا بدونك تنقلب صحراء وشينة

افتدي نظرة عيونك واشتريها بألف خاطر
ومن غلاتك بس عندي عيني صارت لك مدينة